Fossavatnsgangan 50 km

Dagsetning:

20. apríl 2024

Ræsing:

08:00–09:00

Gönguaðferð:

Hefðbundin

Aldursmörk:

16 ára

Fljótandi start:

Bakpoka­skylda:

Tímamörk:

6,5 klst fyrir 35 km

50 km Fossavatnsgangan telur sem ein af fjórum þrautum Landvættanna.

Brautin

Í hnotskurn

Fyrstu 15 km eru strembnir, en þá liggur leiðin frá Seljalandsdal upp á Hnífa, Botnheiði og áfram yfir Fellsháls. Þaðan er léttur 10 km leggur niður að Nónvatni og áfram fyrir Engidal að Steini, skammt frá Fossavatni, þar sem gangan er hálfnuð. Við Steininn er snúið við og haldið til baka að Nónvatni. Þaðan er farið yfir Fellshálsinn í annað sinn. Sá leggur er um 8 km langur og mjög strembinn. Loks liggur leiðin um tiltölulega létt landslag á Botnsheiði og fyrir Búrfell, þar sem við tekur erfitt klifur upp á Miðfellsháls. Þaðan eru 7 auðveldir km heim í mark.

Vegalengdir milli drykkjarstöðva

Rásmark-  Búrfell5,2 km
Búrfell – Heiðin 4,5 km
Heiðin – Nónvatn9,7 km
Nónvatn – Nónvatn8,3 km
Nónvatn – Heiðin6,7 km
Heiðin – Búrfell5,4 km
Búrfell – endamark10,2 km
Kort af 50 km brautinni. Gagnvirk útgáfa. Sjá einnig á OpenSnowMap.
Yfirlitsmynd eftir Ómar Smára.

Brautarlýsing

Lagt er af stað frá skíðagönguhúsinu á Seljalandsdal til norðurs eins og í hinum vegalengdunum. Fyrsti kílómetrinn er léttur hringur um start/marksvæðið en næsti kílómetri er hins vegar strembinn, með nokkuð bröttu klifri upp á Háubrún, einn besta útsýnisstað brautarinnar. Þaðan er fallegt að horfa yfir Skutulsfjörðinn og upplagt að smella af einni mynd eða svo ef fólk er ekki að flýta sér þeim mun meira.

Þegar þangað er komið er heilmikil hækkun að baki, eða 155 metrar á fyrstu 4 km. Við höldum áfram u.þ.b. einn kílómetra í viðbót og komum þá að fyrstu drykkjarstöðinni, undir fallegu fjalli sem nefnist Búrfell. Nú tekur við vel þeginn léttur kafli áður en við þokum okkur yfir svokallaða Hnífa. Eftir þá, að loknum 8 km, tekur svo við nokkuð strembið klifur í 2 km upp að gatnamótum Breiðadals- og Botnsheiða, þar sem við komum að næstu drykkjarstöð. Þangað liggur akfær vegur, en hann er þó ekki opinn fyrir almenning, heldur eingöngu fyrir starfsfólk mótsins og neyðaraðstoð.

Áfram heldur brautin að mestu upp á við u.þ.b. 4,5 km í viðbót þar til komið er upp á Fellsháls. Hér hafa 15 strembnir kílómetrar verið lagðir að baki og verðlaunin eru ríkuleg: Fallegt útsýni yfir Skutulsfjörðinn og svo léttur 5 km kafli niður að næstu drykkjarstöð við Nónvatn. Leiðin er svo áfram fremur létt fyrir Engidalinn og yfir að Steini, þar sem Fossavatnsgangan var ræst hér á árum áður (sjálft Fossavatnið er þar steinsnar frá). Við Steininn er gangan u.þ.b. hálfnuð og tímabært að snúa við. Nú gerist brautin erfið á ný, því við tekur nokkur hækkun upp að Nónvatni. Þar komum við aftur að drykkjarstöð og það er rétt að nota hana vel því framundan er mjög strembið 8 km klifur upp Fellshálsinn, sem er hæsti punktur brautarinnar. Þegar upp er komið hafa um 33 km verið lagðir að baki og við tekur léttur kafli niður að drykkjarstöðinni á Botnsheiði.

Nú eru framundan rúmir 5 km í tiltölulega þægilegu landslagi. Sú sæla varir þó ekki ýkja lengi því þegar við höfum heimsótt drykkjarstöðina undir Búrfelli í annað sinn, eftir u.þ.b. 39 km, hefst nokkuð strembið klifur þar sem kallað er „á milli fella“, þ.e.a.s. á milli fjallanna Búrfells og Miðfells. Þegar komið er upp í Gyltuskarð, þaðan sem hægt er að sjá niður í Botnsdal í Súgandafirði, er snúið til hægri og við tekur frægasta brekkan í Fossavatnsgöngunni, sjálfur Miðfellshálsinn. Hálsinn sá hefur reynst mörgum erfiður í gegnum áratugina. Hér er gengið upp langan, brattan sneiðing og fæstir eiga miklar orkubirgðir á tankinum þegar upp er komið. En það kemur svo sem ekki að sök því nú taka við léttir 7 km í mark, með löngu rennsli og ýtingum. Þó er rétt að vera á varðbergi því víða er rennslið mjög hratt og getur verið varasamt, sérstaklega fyrir óvana.

Hæðarprófíll

Hæðarprófíll af brautinni.
Rásmark290 m.y.s
Hæsti punktur (Fellsháls)614 m.y.s.
Lengsta klifur115 m (yfir Miðfellsháls)
Heildarklifur1.250 m
Hækkun og metrar yfir sjávarmáli

Stór atriði og smá

Fljótandi start

Fljótandi start er í 50 km göngunni. Það þýðir að opnað er fyrir start kl. 08:00 og allir sem vilja geta farið af stað þá. Opið er næsta klukkutímann til að fara af stað þegar þátttakendum hentar. Tími er reiknaður út frá þeim tíma sem lagt er af stað.

Ferðir upp og niður

Ekki er pláss fyrir einkabíla á skíðasvæðinu og því eru rútur sem ganga fyrir mót og aftur niður.

Nánari upplýsingar hér.

Fatatöskur

Í rásmarkinu er hægt að geyma föt í töskum eða bakpokum (eins og þessum sem Fossavatnsgangan selur eða sambærilegan). Töskurnar eru geymdar úti og því þarf að velja þær með tilliti til veðurs. Þátttakendur fá miða með númeri til að merkja töskuna sína.

Allir ganga með bakpoka

Allra veðra er von í Fossavatnsgöngunni og margt sem getur komið upp á. Af öryggisástæðum er því skylda að bera bakpoka í 25 km og 50 km göngunum á laugardeginum. Ekki er heimilt að nota mittistöskur undir fatnað.

Bakpokinn skal að minnsta kosti innihalda hlýjar buxur, hlýjan jakka, húfu og vettlinga. Auk þess taka flestir með sér einhverja næringu, drykkjarmál eða flösku (ekki eru lengur glös á drykkjarstöðvum), skíðaáburð ef það á við og síma. Pokinn þarf að vera a.m.k. 1,5 kg að þyngd. Starfsmönnum er heimilt að athuga pokann þegar keppendur koma í mark. Reynist pokinn of léttur, innihald hans ekki fullnægjandi, eða ef þátttakandi hefur gengið gönguna án poka bætist 15 mínútna refstitími við lokatíma viðkomandi. Hægt er að kaupa bakpoka í netverslun Fossavatnsgöngunnar.

Tímamörk

Við erum með tímamörk í 50 km göngunni. Keppandi verður að vera kominn framhjá drykkjarstöðinni á Heiðinni (ca. 10 km) fyrir kl. 10:30 (miðað við ræsingu á bilinu 08:00–09:00) og svo til baka á sömu stöð á Heiðinni eftir ca. 35 km (fyrir kl. 14:30 miðað við ræsingu 08:00–09:00). Allir sem ná ekki tímamörkum verða stöðvaðir á þessum stöðvum og fluttir að endamarki Seljalandsdal.

Kaffihlaðborð og verðlaunaafhending

Veglegt kaffihlaðborð fer fram í íþróttahúsinu Torfnesi frá 15:00–17:00. Hlaðborðið er innifalið í þátttökugjaldinu.

Verðlaun fyrir efstu sæti í karla- og kvennaflokki eru veitt strax að göngu lokinni, en aldursflokkaverðlaun eru veitt á kaffihlaðborðinu, um kl. 16:00.

Nokkrar myndir