Andreas Nygaard kemur

Norðmaðurinn Andreas Nygaard hefur boðað komu sína í Fossavatnsgönguna í næsta mánuði. Þetta eru frábær tíðindi fyrir áhugafólk um skíðagöngu, en Nygaard hefur undanfarin ár verið einn allra besti skíðagöngumaður heims í lengri vegalengdum. Hann er sigursælasti karlkyns keppandinn í sögu Ski Classics mótaraðarinnar, en sú mótaröð er e.k. heimsbikarkeppni í lengri vegalengdum. Flest þekktustu skíðagöngumót veraldar eru aðilar að Ski Classics, þ.a.m. Vasagangan í Svíþjóð, Birkibeinagangan í Noregi og Marcialonga á Ítalíu.

Í Ski Classics keppir fólk ekki fyrir landslið heldur fyrir atvinnulið, en Andreas Nygaard fékk sinn fyrsta samning hjá atvinnuliði eftir að hafa náð sjötta sæti í Vasagöngunni árið 2014. Það þótti eftirtektarvert við þann árangur að Nygaard stoppaði á leiðinni til að leita að skíðagleraugum sem hann missti. Hann var á þessum tíma fátækur læknanemi og tímdi ekki að skilja gleraugun eftir í snjónum. Eftir að hafa fundið þau náði hann fremsta hópnum aftur og endaði sem fyrr segir í sjötta sæti. Sagan segir að þessi framganga hafi vakið athygli atvinnuliðanna og tryggt Nygaard samning hjá Team Centric liðinu, sem í dag heitir Team Ragde Charge.

Allar götur síðan hefur Andreas Nygaard verið í fremstu röð. Hann hefur t.d. unnið Vasagönguns tvisvar sinnum, Birkibeinagönguna fimm sinnum og Marcialonga vann hann árið 2025. Þá hefur hann þrisvar sinnum unnið gula vestið, heildar stigakeppni Ski Classics og tvisvar sinnum unnið græna vestið, sem er sprettkeppni innan Ski Classics.

Fyrr á þessu árið var Andreas Nygaard til umfjöllunar í norska íþróttatímaritinu Kondis. Þar segir blaðamaðurinn m.a.: „Hann hefur fært landamæri, slegið met og endurskilgreint heila íþrótt … sigursælasti karlkyns keppandinn í sögu Ski Classics“.

Við hlökkum til að fá Andreas Nygaard á ráslínuna á Seljalandsdal þann 18. apríl.

Eftir frekar snjóléttan vetur framanaf hefur snjór komið í talsverðu magni. Fossavatnsgöngunni hefur aldrei verið aflýst vegna snjóleysis og það stefnir ekki í það í ár heldur.

Við erum duglegri að uppfæra Facebook– og Instagram-síðurnar okkar heldur en þessa hér.