Dagsetning
12. apríl 2025
Ræsing
09:15–10:00
Gönguaðferð
Hefðbundin
Brautin
Í hnotskurn
Fyrstu 15 km eru strembnir, en þá liggur leiðin frá Seljalandsdal upp á Hnífa, Botnheiði og áfram yfir Fellsháls. Þaðan er léttur 10 km leggur niður að Nónvatni og áfram Gengið er frá Seljalandsdal fram brúnir upp á Botnsheiði og svo aftur til baka yfir Miðfellsháls, sem er strembinn. Fyrstu 12 km eru talsvert erfiðir, en síðustu 7 km mjög léttir. Alvöru áskorun.
Vegalengdir milli drykkjarstöðva
| Rásmark- Búrfell | 5,2 km |
| Búrfell – Heiðin | 4,5 km |
| Heiðin – Búrfell | 5,4 km |
| Búrfell – endamark | 10,2 km |
Brautarlýsing
Lagt er af stað frá skíðagönguhúsinu á Seljalandsdal til norðurs eins og í hinum vegalengdunum. Fyrsti kílómetrinn er léttur hringur um start/marksvæðið en næsti kílómetri er hins vegar strembinn, með nokkuð bröttu klifri upp á Háubrún, einn besta útsýnisstað brautarinnar. Þaðan er fallegt að horfa yfir Skutulsfjörðinn og upplagt að smella af einni mynd eða svo ef fólk er ekki að flýta sér þeim mun meira.
Þegar þangað er komið er heilmikil hækkun að baki, eða 155 metrar á fyrstu 4 km. Við höldum áfram u.þ.b. einn kílómetra í viðbót og komum þá að fyrstu drykkjarstöðinni, undir fallegu fjalli sem nefnist Búrfell. Nú tekur við vel þeginn léttur kafli áður en við þokum okkur yfir svokallaða Hnífa. Eftir þá, að loknum 8 km, tekur svo við nokkuð strembið klifur í 2 km upp að gatnamótum Breiðadals- og Botnsheiða, þar sem við komum að næstu drykkjarstöð. Þangað liggur akfær vegur, en hann er þó ekki opinn fyrir almenning, heldur eingöngu fyrir starfsfólk mótsins og neyðaraðstoð.
Hér hafa u.þ.b. 10 km verið lagðir að baki og nú léttist brautin nokkuð næstu kílómetrana á meðan gengið er eftir Botnsheiðinni. Sú sæla varir þó ekki ýkja lengi því þegar við höfum heimsótt drykkjarstöðina undir Búrfelli í annað sinn, eftir u.þ.b. 16 km, hefst nokkuð strembið klifur þar sem kallað er „á milli fella“, þ.e.a.s. á milli fjallanna Búrfells og Miðfells. Þegar komið er upp í Gyltuskarð, þaðan sem hægt er að sjá niður í Botnsdal í Súgandafirði, er snúið til hægri og við tekur frægasta brekkan í Fossavatnsgöngunni, sjálfur Miðfellshálsinn. Hálsinn sá hefur reynst mörgum erfiður í gegnum áratugina. Hér er gengið upp langan, brattan sneiðing og fæstir eiga miklar orkubirgðir á tankinum þegar upp er komið. En það kemur svo sem ekki að sök því nú taka við léttir 7 km í mark, með löngu rennsli og ýtingum. Þó er rétt að vera á varðbergi því víða er rennslið mjög hratt og getur verið varasamt, sérstaklega fyrir óvana.
Hæðarprófíll
| Rásmark | 290 m.y.s |
| Hæsti punktur (Miðfellsháls) | 607 m.y.s. |
| Lengsta klifur | 115 m (yfir Miðfellsháls) |
| Heildarklifur | 520 m |
Stór atriði og smá
Fljótandi start og engin tímamörk
Keppni hefst kl. 09:00 en rásmarkið opið til 09:30. Tími byrjar ekki að telja fyrr en farið er af stað skv. tímatökuflögu.
Ferðir upp og niður
Ekki er pláss fyrir einkabíla á skíðasvæðinu og því eru rútur sem ganga fyrir mót og aftur niður.
Fatatöskur
Í rásmarkinu er hægt að geyma föt í töskum eða bakpokum (eins og þessum sem Fossavatnsgangan selur eða sambærilegan). Töskurnar eru geymdar úti og því þarf að velja þær með tilliti til veðurs. Þátttakendur fá miða með númeri til að merkja töskuna sína.
Allir ganga með bakpoka
Allra veðra er von í Fossavatnsgöngunni og margt sem getur komið upp á. Af öryggisástæðum er því skylda að bera bakpoka í 25 km og 50 km göngunum á laugardeginum. Ekki er heimilt að nota mittistöskur undir fatnað.
Bakpokinn skal að minnsta kosti innihalda hlýjar buxur, hlýjan jakka, húfu og vettlinga. Auk þess taka flestir með sér einhverja næringu, drykkjarmál eða flösku (ekki eru lengur glös á drykkjarstöðvum), skíðaáburð ef það á við og síma. Pokinn þarf að vera a.m.k. 1,5 kg að þyngd. Starfsmönnum er heimilt að athuga pokann þegar keppendur koma í mark. Reynist pokinn of léttur, innihald hans ekki fullnægjandi, eða ef þátttakandi hefur gengið gönguna án poka bætist 15 mínútna refstitími við lokatíma viðkomandi. Hægt er að kaupa bakpoka í netverslun Fossavatnsgöngunnar.
Kaffihlaðborð og verðlaunaafhending
Veglegt kaffihlaðborð fer fram í íþróttahúsinu Torfnesi frá 15:00–17:00. Hlaðborðið er innifalið í þátttökugjaldinu.
