Dagur Benediktsson úr Skíðafélagi Ísfirðinga og hin norska Anikken Gjerde Alnæs sigruðu 25 km Fossavatnsskautið sem fór fram á Seljalandsdal í gærkvöldi. Dagur kláraði gönguna á tímanum 01:12:09.1 og Anikken á tímanum 01:16:19.6. Næstir í karlaflokki komu þeir Magnus Waaler, frá Noregi, og Stefano Zanotto frá Ítalíu. Annað sætið í kvennaflokki hreppti Heli Annika Heiskanen frá Finnlandi og Karoline Næss frá Noregi var í þriðja sæti.
Alls kláruðu 75 þátttakendur frá 16 löndum Fossavatnsskautið, þar sem keppt er með frjálsri aðferð. Gengnir eru 25 kílómetrar um nokkuð strembna leið með samtals 520 metra hækkun, þar sem lengsta klifrið er 115 metrar. Aðstæður í brautinni í gær voru nokkuð góðar; skýjað, lítill vindur og um þriggja stiga frost.
Í gær fóru einnig fram Fjölskyldufossavatnið, sem er 5 km, ganga, og Krakkafossavatnið sem er 1 km ganga með þrautabraut.
Heildarúrslit í keppnunum má nálgast á www.timataka.net.
